1455. Juni 21. Oppeln

Wir Bolko von gottsgnaden herczug zcu Oppul etc. bekennen vnd thuen kunth vffintlichen mit diesim brieffe vor allen den die en sehen horen ader leßen, das wir mit des Ersammes Sigmundes Probstes von Czarnowns vnd vnser lewte vnd vndirsesen von Lichinya beyderseyt gutter willen vnd bete guttlichen vnd ewiclichen vorricht, vnd czwisschen en eyne volkemliche vnd ewicliche vorrichtunge gemacht haben als von des Czendes twegen, den do die gnanten vnser lewte von Lichinya flichtig seynt ken Czarnowns dem Closter vnd dem Orden Jerlichen czugeben vnd nemlichen also, wen vnser gnante lewte vnd vndirsesen doselbisten czu Lichinya breyte groschen nichten mochten gehaben So sullen sie vor yden breyte grosche ffumffczen gengliche heller geben vnd dy man do in vnserm lande czu den selbigen geczeyten nemen wurde, vnd das dem genanten Probste vnd dem gnanten Closter vnd Orden awsrichten an alle wedirsperrunge vnd wedirredunge, vnd wen das geschege so sal em der Probost vnd das Closter doran lassen genugen, vnd auch dorumme nymmermer reden nw vnd ewiclich. Des czu Orkundis vnd besser Zicherheyt haben wir vnsir ffurstlich Ingesegil an diesin brieff lassen hengen, Der do gegeben ist am Sonnobende vor Sinty Johannis des Tewffers tage Nach Christi geburt firczenhundert vnd yn dem ffumff vnd ffumffczigsten Jar, Vnd dobey seyn gewest dy woltuchtigen, Conrad Vnyeg von Jasona, Wenczel vnser Marssalk von der Sucha, Hencze von der Coye, Bogusch von Syronyowicz, Janke von Zdiechowicz, vnd herre Johannes Lensch von Reynirschdorff vnser Schreyber dem desir brieff beffolen wart zcu schreyben.

Siegel in rothem Wachs mit der Umschrift: sigillum. ducis. bolkonis. de. oppol. In der Mitte ein Adler auf einem Helm.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 1, Urkunden des Klosters Czarnowanz. Hrsg von dr W. Wattenbach, Breslau 1857.